ஈற்றடிக்கு எழுதிய வெண்பா - அமுதசுரபியில் வெளியானது

அமுதசுரபி மாத இதழில் வாசகர் காந்தி ஜயந்தியையொட்டி, காந்திஜியின் மதுவிலக்குக்கொள்கையைக் கருத்தோட்டமாகக் கொண்டு வெண்பாப்போட்டி அறிவிக்கப்பட்டிருந்தது. அந்தப்போட்டிக்காக நான் எழுதிய வெண்பாவும் தேர்வாகிப் பிரசுரமாகியிருக்கிறது.

தேர்வாகிப் பிரசுரமான வெண்பாவைத்தவிர, நான் எழுதிய மேலும் சில வெண்பாக்கள் இங்கே உங்கள் பார்வைக்கு:

மானத்தைக் கொல்லும் மதுவினைத் தள்ளுவதே

ஈனத்தைத் தீர்க்கும் வழியென்றார் — தேசத்து

உத்தமர் காந்தி உரைத்தசொல் ஏற்றக்கால்

சித்தம் தெளியும் சிறப்பு.

நாட்டினைக் காத்திடும் நல்வழியாய்க் காந்தியண்ணல்

காட்டி மதுவிலக்கைக் கோரியது — ஏட்டுடன்

நில்லாமல் வாழ்வினில் நேர்ந்தால் குடும்பத்தில்

செல்வமொடு சேர்ந்திடும் சீர்.

குடிப்பழக்கம் தீமை கொடுக்கும் எனவே

அடியோடு கள்ளை அறவே ஒறுத்து 

மடியின்றி காந்தி முயன்ற அறத்தைப்

பிடித்திடின் சீர்எய்தும் பெற்று.

கள்ளினை உண்டால் களிப்பும் கெடுமென்றே

வள்ளல் உரைத்தார் வழிநின்று — தெள்ளி

மனமாசு நீக்கும் மகாத்மாசொல் கேளீர்

தினமும் விலக்கு துணிந்து.